शासकीय रुग्णालयात खाजगी हॉस्पिटलची जाहिरात; आरोग्य विभागाच्या कारभारावर प्रश्नचिन्ह
समर्थ 24 न्युज नेटवर्क. फलटण
फलटण : फलटण येथील शासकीय उपजिल्हा रुग्णालयात चक्क एका खाजगी हॉस्पिटलची जाहिरात लावण्यात आल्याचा प्रकार समोर आल्याने आरोग्य विभागाच्या कारभारावर प्रश्नचिन्ह निर्माण झाले आहे. रुग्णालयातील केस पेपर विभागासमोर तसेच मुख्य प्रवेशद्वाराजवळ खाजगी डॉक्टरांचा स्टँडी लावण्यात आल्याने नागरिकांमध्ये आश्चर्य व्यक्त होत आहे.
सरकारी रुग्णालयात खाजगी डॉक्टरांची चिठ्ठी देणे, बाहेरील औषधे सुचवणे अथवा रुग्णांना खाजगी रुग्णालयांकडे वळवणे यावर नियमांनुसार बंदी असताना, थेट रुग्णालय परिसरातच खाजगी हॉस्पिटलची जाहिरात झळकणे गंभीर बाब मानली जात आहे. त्यामुळे संबंधित खाजगी डॉक्टरांसोबत कोणाचे लागेबांधे आहेत का? असा सवाल आता उपस्थित केला जात आहे.
उपजिल्हा रुग्णालयात दररोज शेकडो रुग्ण उपचारासाठी येत असतात. अशा ठिकाणी खाजगी हॉस्पिटलची जाहिरात लावल्यामुळे सामान्य रुग्णांवर अप्रत्यक्ष प्रभाव टाकण्याचा प्रयत्न होत असल्याची चर्चा सुरू झाली आहे.
ही जाहिरात नेमकी कोणाच्या परवानगीने लावण्यात आली? प्रशासनाला याची माहिती होती का? तसेच यामागे कोणते आर्थिक हितसंबंध आहेत का? याबाबत सातारा जिल्हा आरोग्य विभागाने तातडीने चौकशी करून संबंधितांवर कारवाई करावी, अशी मागणी नागरिकांकडून होत आहे.
