फलटण (प्रतिनिधी) |बारामती रोड, फलटण येथील नवचैतन्य गणेश मित्र मंडळ यांची गणेश विसर्जन मिरवणूक यंदाही आदर्श ठरली. डीजेचा दणदणाट आणि गुलालाच्या धुराविना काढण्यात आलेली ही मिरवणूक पाहण्यासाठी नागरिक मोठ्या संख्येने उपस्थित होते.
गणपती स्थापनेपासून मंडळाकडून दररोज संध्याकाळी विविध सांस्कृतिक कार्यक्रमांचे आयोजन करण्यात आले. लहान मुलांसाठी बौद्धिक व शारीरिक खेळ तर महिलांसाठी वेगवेगळ्या मनोरंजक खेळांचे आयोजन करून मंडळाने गणेशोत्सव अधिक रंगतदार केला.
या वर्षी सर्व कार्यकर्त्यांनी वारकरी संप्रदायाचा पोशाख धारण करून शिस्तबद्धपणे मिरवणूक काढली. भक्तिगीते, टाळ-मृदंगाचा गजर, हरिनामाच्या घोषात निघालेली मिरवणूक सर्वांसाठी प्रेरणादायी ठरली.
डीजे-मुक्त व गुलालमुक्त मिरवणूक ही नवचैतन्य मंडळाची ओळख बनली असून, पर्यावरणपूरक आणि सांस्कृतिक परंपरा जपणारा हा उपक्रम समाजातून सर्वत्र कौतुकास पात्र ठरला आहे.
