फलटण दि.२९| हॉकीचे जादूगार मेजर ध्यानचंद यांच्या जयंतीनिमित्त २९ ऑगस्ट रोजी राष्ट्रीय क्रीडा दिन फलटण शहरात उत्साहात साजरा करण्यात आला. या निमित्ताने क्रीडा व युवक सेवा संचालनालय, महाराष्ट्र राज्य, पुणे; जिल्हा क्रीडा अधिकारी कार्यालय सातारा; मुधोजी हायस्कूल व जुनियर कॉलेज, फलटण; दि. हॉकी सातारा तसेच तालुका क्रीडा अधिकारी कार्यालय फलटण यांच्या संयुक्त विद्यमाने शालेय जिल्हास्तरीय नेहरू कप हॉकी स्पर्धेचे उद्घाटन मोठ्या पार पडले.कार्यक्रमाची सुरुवात हॉकीचे जादूगार मेजर ध्यानचंद यांच्या प्रतिमेस पुष्पहार अर्पण करून त्यांच्या स्मृतींना अभिवादन करण्यात झाली.
उद्घाटनप्रसंगी प्रमुख पाहुणे म्हणून श्रीमंत संजीवराजे नाईक निंबाळकर, तालुका क्रीडा अधिकारी श्रीमती सुप्रिया गाढवे, माजी क्रीडा अधिकारी महेश कुटाळे, किरण बोळे पत्रकार तरुण भारत, अशोक सस्ते, पत्रकार सकाळ, जगन्नाथ धुमाळ ज्येष्ठ हॉकी प्रशिक्षक, बी.बी.खुरुगे सर, सचिन धुमाळ मुधोजी हायस्कूल क्रीडा शिक्षक, क्रीडा समिती सदस्य शिवाजीराव घोरपडे, वसंत शेडगे, महेंद्र जाधव, समर अहिवळे, गणेश भोईटे व कपिल मोरे आदी मान्यवर उपस्थित होते.
उद्घाटन प्रसंगी श्रीमंत संजीवराजे नाईक निंबाळकर यांनी खेळाडूंना प्रोत्साहनपर संदेश देताना सांगितले की,
“खेळाडूंनी जिद्द, मेहनत आणि शिस्त या तीन गोष्टींच्या बळावर खेळात आपले स्थान निर्माण करावे. मेजर ध्यानचंद यांचा आदर्श समोर ठेवून खेळाडूंनी पुढे जात राहिले तर खरी क्रीडासेवा होईल.”तसेच त्यांनी सर्व खेळाडूंना राष्ट्रीय क्रीडा दिनाच्या शुभेच्छा दिल्या.
या स्पर्धेच्या माध्यमातून जिल्ह्यातील हॉकीपटूंना आपली प्रतिभा सादर करण्याची आणि पुढील स्तरावर जाण्याची संधी उपलब्ध होत आहे. आयोजकांनी व्यक्त केलेला विश्वास लक्षात घेता, या उपक्रमामुळे शालेय सातारा जिल्ह्यातील हॉकी क्रीडेला निश्चितच नवे बळ मिळेल.
