होळ येथे दूध भेसळ प्रकरणाचा पर्दाफाश; अन्न व औषध प्रशासनाची धडक कारवाई
व्हे पावडर, नॉन-डेअरी क्रीम पावडरसह मिक्सर जप्त लक्ष
समर्थ 24 तास न्यूज नेटवर्क
फलटण :
फलटण तालुक्यातील होळ येथे दूध भेसळीच्या संशयावरून अन्न व औषध प्रशासनाने रविवारी दि. १२ दुपारी धडक कारवाई करत संशयित तीन आरोपींच्या गोठ्यावर छापा टाकला. या कारवाईत बनावट दूध तयार करण्यासाठी वापरले जात असल्याचा संशय असलेले साहित्य तसेच मिक्सर जप्त करण्यात आला.
सहआयुक्त तुषार शिंगाडे यांच्या मार्गदर्शनाखाली अन्न सुरक्षा अधिकारी रुपाली खापणे, इम्रान हवालदार आणि ऋतुजा चव्हाण यांच्या पथकाने ही कारवाई केली.
छाप्यादरम्यान गोठ्यातून सुमारे ४ किलो औद्योगिक वापरासाठी असलेली व्हे पावडर (एसएनएफ वाढविण्यासाठी वापरली जाणारी), ३ किलो नॉन-डेअरी क्रीम पावडर तसेच हे साहित्य एकत्रित करण्यासाठी वापरला जाणारा मिक्सर जप्त करण्यात आला.
कारवाईदरम्यान फलटण ग्रामीण पोलीस ठाण्याचे महिला पोलीस उपनिरीक्षक ज्योती चव्हाण, पोलीस हवालदार महादेव पिसे, अमोल पवार तसेच पोलीस कॉन्स्टेबल सूरज काकडे, श्रीकांत खरात, कल्पेश काशीद आणि महिला पोलीस कॉन्स्टेबल अश्विनी साळुंखे यांनी बंदोबस्ताची जबाबदारी पार पाडली.
जप्त करण्यात आलेल्या साहित्याचे नमुने तपासणीसाठी प्रयोगशाळेत पाठविण्यात येणार आहेत. तपासणी अहवाल प्राप्त झाल्यानंतर संबंधितांवर अन्न सुरक्षा व मानके अधिनियमांतर्गत पुढील कायदेशीर कारवाई सुरू असून रात्री उशिरा पर्यंत गुन्हा नोंद करण्याची कारवाई सुरू होती .
दरम्यान, फलटण ग्रामीण पोलिसांनी संशयितांना ताब्यात घेतले असून पुढील कायदेशीर प्रक्रिया सुरू असल्याची माहिती प्रशासनाच्या वतीने देण्यात आली.
