*श्री दत्त इंडिया साखर कारखान्याचे मुख्य प्रशासकीय अधिकारी अजितराव जगताप साहेब यांच्या वाढदिवसानिमित्त विद्यार्थ्यांना शालेय _साहित्याचे_ वाटप; साखरवाडीतील उपक्रमाचे कौतुक*
फलटण : समर्थ 24 तास न्यूज नेटवर्क
साखरवाडी (ता. फलटण) येथील भारतरत्न डॉ. बाबासाहेब आंबेडकर आश्रम शाळा येथे विद्यार्थ्यांना शालेय साहित्याचे वाटप करून वाढदिवस साजरा करण्याचा स्तुत्य उपक्रम राबविण्यात आला. श्री दत्त इंडिया साखर कारखान्याचे मुख्य प्रशासकीय अधिकारी अजितराव जगताप यांच्या वाढदिवसानिमित्त हा कार्यक्रम आयोजित करण्यात आला होता.
या उपक्रमाअंतर्गत आश्रम शाळेतील विद्यार्थ्यांना वह्या, पेन, पेन्सिल तसेच इतर आवश्यक शालेय साहित्याचे वाटप करण्यात आले. याशिवाय विद्यार्थ्यांना अल्पोपहारही देण्यात आला. या उपक्रमामुळे विद्यार्थ्यांमध्ये उत्साहाचे आणि आनंदाचे वातावरण निर्माण झाले होते. अनेक विद्यार्थ्यांच्या चेहऱ्यावर समाधानाचे हास्य झळकत होते.
कार्यक्रमास आश्रम शाळेचे सचिव तसेच ग्रामपंचायत सदस्य हरीश गायकवाड यांची प्रमुख उपस्थिती होती. यावेळी त्यांनी या उपक्रमाचे मनापासून कौतुक केले. समाजातील गरजू विद्यार्थ्यांसाठी अशा प्रकारचे उपक्रम राबविणे ही सामाजिक बांधिलकीची जाणीव असल्याचे त्यांनी नमूद केले. तसेच भविष्यातही अशा उपक्रमांना प्रोत्साहन देण्याची गरज असल्याचे त्यांनी अधोरेखित केले.
दरम्यान, या अभिनव उपक्रमामुळे आश्रम शाळेतील विद्यार्थ्यांना मोठा दिलासा मिळाला असून परिसरातही या उपक्रमाचे स्वागत करण्यात येत आहे. सामाजिक जाणीव जपत वाढदिवस साजरा करण्याचा हा आदर्श इतरांसाठीही प्रेरणादायी ठरत आहे.
